Sonia Rolland yakozweho iperereza ku nyubako yahawe n’umuryango wa Omar Bongo wayoboye Gabon

Sonia Rolland wabaye Nyampinga w’u Bufaransa 2000 ari kubazwa ku nyubako nziza yo guturamo yahawe n’uwari umugore wa Perezida wa Gabon Omar Bongo.

Sonia Rolland yitabye Ibiro Bikuru Bishinzwe Kurwanya Ibyaha Bikomeye by’Imari (OCRGDF) tariki 06 Mutarama 2021 ku iperereza ruri gukora ku byaha birimo kunyereza umutungo wa rubanda.

Yisobanuye ku nyubako mpano y’inyubako yahawe n’umugore wa Omar Bongo mu 2003, ifite agaciro k’amayero ibihumbi 800 asaga miliyoni 900.

Iyi nyubako iherereye mu Mujyi wa Paris ahitwa Passy.

Ikinyamakuru La Liberation cyanditse ko Sonia Rolland yahuye n’umugore wa Omar Bongo, Edith Bongo mu 2001 ubwo yari yitabiriye amarushanwa y’ubwiza muri Afurika.

Mu 2002 uyu mugore yaje kumubwira ko agiye kumuha impano mu rwego rwo kumushimira ko yahesheje ishema umugabane w’Afurika nka Nyampinga wa mbere w’u Bufaransa ukomoka kuri uyu mugabane. Sonia Rolland akomoka ku munyarwandakazi n’umufaransa.

Iyo nzu yaguzwe n’ikigo cyakoraga ibijyanye n’imitako gifite ishami muri Gabon ndetse na konti yacyo muri icyo gihugu yabitswagaho umurundo w’amafaranga n’abantu bakoranaga na Perezida Bongo.

Kuva mu 2010 ubutabera bw’u Bufaransa buri gukora iperereza ku mitungo abayobozi bo muri Afurika barimo na Omar Bongo bafite muri iki gihugu.

Mu 2016 imitungo itimukanwa y’umuryango wa Ali Bongo umuhungu wa Omar Bongo, iri mu Bufaransa yarafatiriwe.

Sonia Rolland ari kubazwa iby’inzu yahawe n’umugore wa Omar Bongo

Share