RNB 360: The Ben yikuye mu ndirimbo yakoranye na Nel Ngabo

Umuhanzi Nel Ngabo yashyize hanze alubumu ye ya Kabiri itaragaraho The Ben nk’uko byari byatangajwe mbere.

Iyi alubumu yise RNB 360 yashyizwe hanze kuri uyu wa Kabiri tariki 21 Ukuboza 2021.

Ni alubumu iriho indirimbo 11 ziganjemo izo yakoranye n’abandi bahanzi nka Platini, Fireman, Kevin Skaa na Bruce Melodie.

Mu kwamamaza iyi alubumu Nel Ngabo yari yatangaje ko hari indirimbo yitwa Takalamo yakoranye na Platini ndetse na The Ben.

Takalamo yasohotse kuri alubumu ya Nel Nel Ngao ntabwo yumvikanamo ijwi rya The Ben nk’uko byari bitezwe.

Amakuru HOSE yamenye ni uko The Ben ubwe ari we wasabye ko ijwi rye ryavanwa muri iyi ndirimbo hagasigaramo Platini na Nel Ngabo gusa.

Ntituramenya impamvu nyirizina yatumye The Ben afata umwanzuro wo kuva muri iyi ndirimbo dore ko bari baratangiye gupanga uko banayifatira amashusho.

Indirimbo zose ziri kuri alubumu ya kabiri ya Nel Ngabo harimo Perfect, Keza yakoranye na Yvan Buravan, Henny, Muzadukumbura yakoranye na Fireman, Want You Back, Bindimo yakoranye Kevin Skaa na Fireman, Takalamo yakoranye na The Ben na Patini P.

Hari kandi Uzanyibuka, Church Boy ft Angel Mutoni, Waiting, na Mutuale yakoranye na Bruce Melodie iyi yo yasohotse mbere.

Umva Takalamo itarimo The Ben

Arsene Muvunyi

Share