Padiri Ubald uzwiho gusengera abarwayi bagakira yanduye COVID-19

Padiri Ubald Rugirangoga uzwi cyane mu gusengera abantu bagakira indwara yatangaje ko yanduye COVID-19 ndetse ari kwitabwaho n’abaganga kugira ngo barokore ubuzima bwe.

Kuva icyorezo cya COVID-19 cyatangira gukwirakwira mu bihugu bitandukanye birimo n’u Rwanda, Padiri Ubald Rugirangonga yari muri Leta Zunze Ubumwe z’Amerika aho yagiye mu bikorwa byo gusengera abantu.

Uyu mupadiri ufite ingabire yo gusengera abantu bagakira indwara za roho n’umubiri, yakomeje kubikora akoresheje facebook ndetse abantu bakomeza gutanga ubuhamya bw’ibyo Imana yabakoreye biciye mu mugaragu wayo.

Hashize iminsi mike abantu batabasha kuvugira hamwe isengesho rya rozari na Padiri Ubald, akaba yatangaje ko icyabiteye ari uko yanduye COVID-19 atameze neza.

Ati “ Turisegura ko nta sengesho rya rozari ryari rihari mu minsi mike ishize. Padiri Ubald arasaba ko musengera. Yanduye COVID-19 ntabwo ameze neza. Ari kwitabwaho bishoboka n’abaganga kugira ngo akire vuba.”

Yahumurije abakirisitu ko umunsi yakize azongera kwifatanya na bo mu isengesho rya rozari, abasaba gukomeza kumusengera.

Leta Zunze Ubumwe z’Amerika ni kimwe mu bihugu byashegeshwe

n’icyorezo cya COVID-19 aho abarenga miliyoni umunani banduye ndaho abasaga ibihumbi 200 bakaba baritabye Imana.

Padiri Ubald afite ingabire yo gusengera abantu bagakira indwara

Share