“Ndi idebe ryawe!” Min. Bamporiki ashimira Isimbi Alliance wamuhaye inka

Umunyamabanga wa Leta Ushinzwe Umuco muri Minisiteri y’Urubyiruko n’Umuco yahawe inka n’umukinnyi wa filime Isimbi Alliance.

Kuri iki cyumweru ku mbuga nkoranyambaga hasakaye amashusho agaragaza Minisitiri Bamporiki Edouard ari gushimira umukinnyi wa filime Isimbi Alliance wa muhaye inka.

Mu Kinyarwanda cy’umwimerere Bamporiki Edouard yemeye kuba “idebe” rya Isimbi Alliance wamuhaye inka.

Ati “Iyo umugore aguhaye inka ukayemera, ahandi iyo umugabo wayiguhaye witwa umugaragu ariko iyo uhawe n’umugore ukayemera witwa itebe. Ndi idebe ryawe!”

Isimbi Alliance akimara kumva ko Minisitiri Bamporiki yemeye kumubera idebe, yataratse atega amaboko, yishimira ko uwo agabiye yakiriye.

Uyu mukobwa yavuze ko impamvu yahaye inka Minisitiri Bamporiki ari uko yahesheje ishema uruganda rwa sinema nyarwanda.

Ati “Bamporiki akora sinema, kuba rero yaragiriwe icyizere avuye mu bakora uyu mwuga kandi akaba akomeje kuduhagararira neza, ni ibihesha ishema abakora sinema mu Rwanda. Njye rero nk’umwe muri abo namushimiye.”

Isimbi Alliance aherutse gushyira hanze filime yise Alliah The Movie, ivuga ku mukobwa washyingiwe ku musore utamukunda agasharirirwa n’urushako.

Share