Israel Mbonyi agiye gukorera ibitaramo muri Isiraheli

Umuhanzi w’indirimbo zo kuramya no guhimbaza Imana Israel Mbonyi agiye gukorera urugendo mu gihugu cya Isiraheli aho azanakorera ibitaramo bitandukanye muri gahunda yiswe Twende Jerusalem.

Iyi gahunda yateguwe ku bufatanye bw’Ambasade ya Isiraheli mu Rwanda n’Ikigo cyitwa GoTell.

Igamije kungurira urubyiruko rwo mu Rwanda na Israel gusura ibihugu byombi dore ko bifite byinshi bihuriyeho no mu mateka yabyo kandi hakaba hari abanya-Isiraheli benshi bazi u Rwanda nk’igihugu cyashegeshwe na Jenoside yakorewe Abatsutsi gusa nta kindi cyiza kihaba.

Ambasade ya Isiraheli mu Rwanda izajya itwara abanyarwanda mu ngeri zitandukanye nk’abaririmbyi, abahanzi b’imideli, abatetsi n’abandi mu rwego rwo kubaka ubushuti kugira icyo bigira ku bandi.

Israel Mbonyi azagenda muri Mata 2021 mu bihe bya Pasika aho azajyana n’urundi rubyiruko rubyifuza rukazanafashwa kubona ibyangombwa by’urugendo.

Mbere y’uko ajya muri iki gihugu, umuhanzi witwa Avram  azaza mu Rwanda batemberane ahantu hatandukanye ndetse banakorane indirimbo.

Mbonyi azakora ibitaramo bitatu mu mijyi itandukanye yo muri iki gihugu gifite amateka akomeye mu bijyanye n’iyobokamana.

Uru rugendo Israel Mbonyi azakorera muri Isiraheli rufite amateka akomeye kuri nk’umuhanzi w’umukirisitu usanzwe unaririmba inkuru zabereye muri iki gihugu zanditse muri Bibiliya.

Abakirisitu batandukanye basanzwe bakora ingendo nyobokamana muri Isiraheli bagasura ahantu hafite amateka ku buzima bwa Yezu n’abadi bantu bavugwa muri Bibiliya.

Israel Mbonyi agiye gutaramira ku butaka butagatifu muri Isiraheli

Share