Ibya Sonny nta bihari, The Ben ari gufashwa n’umunyarwanda

Umuhanzi w’umunyarwanda The Ben yasinye amasezerano y’imyaka ine yo gukorana na Kampani ya Innox Entertainment ikorera muri Leta Zunze Ubumwe z’Amerika.

Kuri uyu wa Kabiri tariki 4 Mutarama 2022 nibwo The Ben na Diamond Platunmz bashyize hanze amashusho y’indirimbo bise Why bakoranye.

Iyi ndirimbo yari yasohotse mu buryo bw’amajwi tariki 02 Mutarama 2022. Mu buryo bw’amajwi yakozwe na Madebeat na Lizer, naho amashusho akorwa na Julien na Hascana.

Iyi ndirimbo igitangira amashusho mu mashusho yayo hagaragaramo ikirango cya Innox Entertaiment n’icya Wasafi ya Diamond Platnumz.

Innox Entertainment ni kampani y’umunyarwanda ikorera muri Leta Zunze Ubumwe z’Amerika ahitwa Portland Mane, ikaba ikora ibikorwa by’imyidagaduro bitandukanye.

Aba nibo bateguye igitaramo The Ben aherutse gukorera mu Mujyi wa Dallas ku Bunani.

Mu kiganiro kigufi HOSE yagiranye na DJ Innox ari nawe muyobozi wa Innox Entertainment yadutangarije ko ubu ari we mujyanama wa The Ben.

Ati “ubu nitwe tumanaging (tureberera inyungu) The Ben)”

DJ Innox yavuze ko bazakorana na The Ben mu gihe cy’imyaka ine ishobora kwiyongera.

Hari hashize iminsi bivugwa ko The Ben ari mu biganiro n’ikigo cya Sony Music, ariko Umuyobozi wa Innox Entertainment yabihakanye avuga ko “Nta Bihari.”

Why niyo ndirimbo ya mbere The Ben ashyize hanze ari muri Innox Entertainment gusa bagiye bakorana mu bitaramo binyuranye.

DJ Innox w’ikote ritukura ubwo banozaga umushinga wo gukorana indirimbo na The Ben
Umushinga wa mbere The Ben yakoze ari gukorana na Innox Entertainment

ARSENE MUVUNYI

Share