Bruce Melodie yamaze kubona umujyanama mushya

Umuhanzi Bruce Melodie yatangaje yamaze gusinya amasezerano  n’umujyanama we mushya Lee Ndayisaba ufite ikigo cya Clouds9 Entertainment.

Ibi Bruce Melodie yabitangaje mu gitondo cyo kuri uyu wa 16 Gashyantare 2021, abicishije ku mbuga nkoranyambaga ze.

Uyu muhanzi ukunzwe bihambaye mu bahanzi bo mu Rwanda, yavuze ko yafashe icyemezo cyo gukorana na Clouds 9 Entertainment mu rwego rwo kumufasha kugeza umuziki we ku ruhando mpuzamahanga.

“Mu rwego rwo kugeza kugeza umuziki wanjye ku yindi ntera no kwagura imbago ku rwego mpuzamahanga no gukomeza gukora umuziki ushimisha abakunzi banjye nk’uko maze imyaka mbikora twiyemeje gukorana na Clouds 9 Entertainment bazajya bacunga inyungu zanjye mu bijyanye n’umuziki.”

Muri iri tangazo, Bruce Melodie yavuze ko umujyanama we Jado Kabanda bari bamaze igihe kinini bakorana, azakomeza kwita ku bikorwa bye birimo Isibo TV na Isibo Group.

Lee Ndayisaba ugiye gucunga inyungu za Bruce Melodie ni umwe mu bantu bamaze igihe kinini muri muzika nyarwanda ndetse n’Akarere k’Afurika y’Uburasirazuba muri rusange.

Yabaye umunyamakuru, aba umuyobozi wa Clouds TV, ndetse mu 2019 umuyobozi w’irushanwa rya East Africa Got Talent ryari ribaye ku nshuro ya mbere.

Lee aziranye n’abantu benshi bafite ijambo mu ruganda rw’imyidagaduro cyane cyane muri Tanzania ari naho hari icyicaro cya Clouds Media. Kuba agiye gukorana na Bruce Melodie bishobora kuba inzira nziza yo kwambutsa uyu muhanzi akagera ku rwego mpuzamahanga.

Bruce Melodie ni umuhanzi umaze imyaka igera kuri ine ari ku gasongero k’umuziki nyarwanda. Ni we wegukanye irushanwa rya nyuma rya PGGSS mu 2018 ndetse yagiye yegukana ibindi bihembo mu myaka yakurikiyeho.

Bruce Melodie yatandukanye na Kabanda Jado bari bamaranye igihe kinini
Lee Ndayisaba ni we mujyanama mushya wa Bruce Melodie

Share