UCL: Bayern yahannye PSG

0
386

Mu mikino ya nyuma yo mu matsinda ane ya mbere mu gikombe gihuza amakipe yabaye aya mbere iwayo (UEFA Champions League/UCL), Bayern Munichen yatsinze Paris Saint Germain ibitego 3-1, gusa ntibyayibuza kuba iya kabiri mu itsinda B bahereyemo.

Ijoro ry’uyu wa kabiri tariki ya 5/12/2017 ryari ibirori ku mugabane w’u Burayi, ubwo hasozwaga imikino y’ijonjora mu matsinda ane ya mbere muri UCL.

Bayern Munichen yatsinze Paris Saint Germain ibitego 3-1

Mu itsinda B: PSG ya Neymar, Mbappe, Cavani n’abandi, yari yagiye ku kibuga cya Bayern Munich, ihatsindirwa ibitego 3-1, byatsinzwe na Corentin Tolisso (watsinze bibiri) n’ikindi cyatsinzwe na Robert Lewandowski, mu gihe Kylian Mbappe ari we watsindiye impozamarira iyo kipe yo mu Bufaransa.

Robert Lewandowski yigaragaje muri uyu mukino

Intsinzi ya Bayern Munich ntiyayihesheje umwanya wa mbere muri iryo tsinda, kuko PSA yakomeje kuriyobora n’amanota 15 izigamye ibitego 21, iyo kipe yo mu Budage bakaba bazamukanye banganya amanota ariko yo izigamye ibitego 4.

Mu wundi mukino wabaye muri iri tsinda B, n’ubwo Anderlecht yatsinze Celtic Glasgow igitego 1-0, ntibyayihesheje itike yo gukomeza muri UCL ariko yahise yerekeza muri Europa League.

Mu itsinda A: Manchester United yatsinze CSKA Moscow ibitego 2-1, byatsinzwe na Romeru Lukaku na Marcus Rashford mu gihe iyo kipe yo mu Burusiya yo yatsindiwe igitego na Vitinho ari na we wafunguye amazamu bwa mbere muri uyu mukino, hari ku munota wa 44.

Mu wundi mukino, FC Basel yatsinze Benfica ibitego 2-0 ihita igira amanota 9, bituma iyo kipe ihita izamukana na Manchester United iyoboye iryo tsinda n’amanota 15, mu gihe CSKA Moscow ari yo izajya muri Europa League.

Mu itsinda C: Chelsea yanganyije igitego 1-1 na Athletico Madrid yamaze gusezererwa muri UCL, bituma AS Roma ihita iyobora iryo tsinda nyuma yo gutsinda Qarabag FK igitego 1-0.

Saul Niguez wa Athletico Madrid ni we wafunguye amazamu ku munota wa 56 w’umukino maze Stephan Savic aza kwitsinda igitego ku munota wa 75, umukino urinda urangira amakipe yombi anganyije.

AS Roma ni iya mbere n’amanota 11 ikanganya amanota na Chelsea, mu gihe Athletico Madrid ari yo igomba guhita yerekeza muri Europa League kuko iza ku mwanya wa gatatu n’amanota indwi.

Mu itsinda D: FC Barcelona yatsinze Sporting CP ibitego 2-0, bituma iyi kipe ihita iyobora iryo tsinda n’amanota 14, mu gihe Juventus de Turin na yo yatsinze Olympiacos ibitego 2-0 bikayihesha umwanya wa kabiri n’amanota 11. Sporting CP ni yo izakina Europa League mu gihe Olympiacos yo yasezerewe.

Kuri uyu wa gatatu tariki ya 6/12/2017 imikino ya UCL irakomeza hakinwa iyo mu matsinda ane ya nyuma (ni ukuvuga kuva ku itsinda E kugeza kuri H), aho umukino ukomeye witezwe ari uza guhuza Real Madrid ishaka gukura Tottenham ku mwanya wa mbere, na Borussia Dortmund ishaka umwanya wa 3 ngo ikomereze muri Europa League, dore ko icyizere cyo gukomeza muri UCL cyo cyayoyotse.