Real Madrid yasimbuje Zinedine Zidane, Umutoza wa Espagne

0
773

Umutoza wa Espagne, Julen Lopetegui ni we wagizwe Umutoza mushya wa Real Madrid ngo asimbure Zinedine Zidane weguye bitunguranye mu cyumweru gishize nyuma yo kwegukana igikombe cya UEFA Champions League.

BBC dukesha iyi nkuru itangaza ko Julen Lopetegui yahawe amasezerano y’imyaka itatu nk’umutoza wa Real Madrid, akazatangira akazi akimara kuva mu mikino ya nyuma y’igikombe cy’Isi, aho agiye ashaka icyo gikombe hamwe n’ikipe ya Espagne.

Uyu mugabo w’imyaka 51 yahoze ari Umunyezamu, ndetse yakiniye Real Madrid umukino umwe ariko ahita ajya gukina muri Logrones, aho yakinnye imikino 107.

Yatangiye umwuga w’ubutoza mu 2003 ubwo yari Umutoza wungirije w’Ikipe y’igihugu ya Espagne y’abatarengeje imyaka 17 (U-17), aza gukomereza muri iyo kipe y’igihugu y’abatarengeje imyaka 19, ajya mu y’abatarengeje 21 maze ahita yerekeza muri FC Porto.

Lopetegui yatoje ikipe ya FC Porto imyaka ibiri mbere y’uko atangira gutoza ikipe nkuru ya Espagne kuva mu kwezi kwa karindwi 2016.

Mu mikino 20 amaze gutoza ikipe y’igihugu ya Espagne ntiratsindwamo n’umwe, aho yatsinze imikino 14 akanganya 6.

Uyu mutoza na Espagne atoza bazatangira imikino y’igikombe cy’Isi bakina na Portugal kuwa gatanu w’iki cyumweru.

Real Madrid izanye uyu mutoza nyuma yo gusoreza ku mwanya wa gatatu ku rutonde rwa shampiyona, aho yarushwaga amanita 17 na FC Barcelona yegukanye igikombe.

Uyu mutoza aje mu gihe Galeth Bale wafashije iyo kipe gutsinda Liverpool ku mukino wa nyuma ikegukana igikombe cya UEFA Champions League yavuze ko yiteguye kuganira n’iyi kipe ku hazaza he, n’aho Christiano Ronaldo we akavuga ko bakwiye gutegereza akazagira icyo atangaza ku hazaza he.