Ntibisanzwe! U Rwanda rwungutse umukinnyi mu kiciro cya mbere ku mugabane w’u Burayi

0
2626

Djihad Bizimana, wari usanzwe ari umukinnyi wo hagati muri APR FC no mu ikipe y’igihugu Amavubi, yamaze gusinya amasezerano y’imyaka 3 mu ikipe yitwa Waasland-Beveren yo mu cyiciro cya mbere mu Bubiligi. Hari amakuru avuga ko yaguzwe ibihumbi 120 by’amaeuro abarirwa muri miliyoni zirenga 125 z’amanyarwanda.

Ni nyuma y’iminsi akora amageragezwa atandukanye muri iyi kipe, ariko amakuru agera kuri HOSE.RW yemeza ko yose uko yakabaye yayatsinze ndetse ngo akaba yaratunguye abakinnyi bagenzi ndetse n’abatoza kubera imikinire ye idasanzwe irimo ubuhanga bwinshi

Urubuga rw’iyi kipe rwemeza ko ari umukinnyi mwiza bungutse uzafasha iyi kipe gukina mu kibuga hagati asa nkufasha ba myugariro (Defensive midfielder).

Urubuga rwa twitter rw’iyi kipe nirwo rwemeje aya makuru

Bitewe n’uko igura n’igurisha ry’abakinnyi ryarangiye ku mugabane w’u Burayi, Bizimana Djihad ashobora gutangira gukinira iyi kipe mu marushanwa azwi na UEFA guhera mu kwezi kwa karindwi uyu mwaka.

Bizimana w’imyaka 22 y’amavuko yari amaze imyaka 3 akinira APR FC, dore ko yari aherutse gusinya andi masezerano y’imyaka ibiri nyuma y’indi ibiri yari asoje, bivuze ko yari agisigajemo undi mwaka umwe.

Bizimana Djihad ntatinya guhangana n’abakinnyi bafite uruhu rwera cyangwa abazungu. Ifoto: Interineti

Amakuru agera kuri Hose.rw avuga ko iyi kipe ya Waasland-Beveren yabengutse Djihad Bizimana mu mikino ya shampiyona nyafurika ihuza amakipe y’ibihugu agizwe n’abakina imbere mu bihugu byabo (CHAN 2018) iheruka kubera muri Maroc.

Intumwa iyo kipe yari yohereje muri iryo rushanwa zabengutse Umunyarwanda Bizimana Djihad by’umwihariko mu mukino Amavubi yakinnye na Nigeria bakanganya 0-0, uyu mukinnyi wo hagati akaba ari na we watowe nk’uwitwaye neza kurusha abandi uwo munsi.

Ikibuga cy’ikipe Bizimana Djihadi ari gukoreramo igerageza

Ikipe ya Waasland-Beveren iri ku mwanya wa 12 ku rutonde rwa shampiyona y’icyiciro cya mbere mu Bubiligi, aho ifite amanota 35 mu mikino 30 imaze gukina, ikaba igiye kugerageza Bizimana Djihad ngo irebe ko yazayifasha kwigira imbere ku rutonde rwa shampiyona mu mwaka utaha w’imikino.

Ikipe ya Waasland-Sportkring-Beveren, Djihad agiye kwerekezamo yasoje imikino ya shampiyona iri ku mwaya wa 12, ubu ikaba iri guhatanira itike yo kuzahagararira ububiligi muri Europa League umwaka utaha.

Iyi kipe yashinzwe mu mwaka w’i 1936 imaze imyaka 3 mu cyiciro cya mbere mu Bubiligi.