McDonald’s yirukanye umuyobozi mukuru wayo kubera gutereta umwe mu bakozi b’ikigo

0
97
Steve Easterbrook yirukanywe ku mwanya w'ubutegetsi bukuru bwa McDonald's. Ifoto: Daily Mail

Kompanyi ya McDonald’s yirukanye umuyobozi mukuru wayo Steve Easterbrook kubera ko yakundanye n’umwe mu bakozi b’iyi kompanyi.

Iyi kompanyi itegura ibiribwa bifatwa ako kanya (fast food) izwi cyane ku isi, ivuga ko urwo rukundo rwabo rwari ku bwumvikane ariko Bwana Easterbrook “Yarenze ku mategeko y’iyi kompanyi isanzwe igenderaho”.

Mu butumwa yandikiye abo bakoranaga, uyu mugabo ukomoka mu Bwongereza ntiyihakanye urwo rukundo kandi yemeye ko ari ikosa.

Ati: “Kubera ibigenderwaho n’iyi kompanyi, ndemeranya n’inama y’ubuyobozi ko iki ari igihe cyanjye ngo nikomereze”.

Bwana Easterbrook w’imyaka 52, watandukanye n’uwo bashakanye, yakoreye bwa mbere McDonald’s mu 1993 nk’umuyobozi wayo i Londres mbere yo kuzamurwa mu ntera.

Mu 2013 yagizwe umuyobozi wayo mu Bwongereza no mu majyaruguru y’Uburayi, mu 2015 nibwo yagizwe umuyobozi mukuru wa McDonald’s ku isi.

Uyu mugabo yagize uruhare rukomeye kuvugurura serivisi n’ibiribwa bitangwa na McDonald’s ndetse no kongera inyungu yayo ku isi.

Kuwa gatanu nibwo inama y’ubuyobozi y’iyi kompanyi yatoye yemeza ko Bwana Easterbrook asezererwa ndetse agahita anegura mu nama y’ubuyobozi bwayo.

Amategeko y’iyi kompanyi abuza abayobozi gukundana n’abo bakoresha.

Siga igitekerezo

Please enter your comment!
Uzuza amazina yawe hano