Intumwa za IMF n’iz’u Rwanda zemeje ko ubukungu bw’igihugu buzazamuka kuri 8.5%

0
126
MINECOFIN niyo ishinzwe imari harimo n'ibyo kwizigamira

Ibiganiro byahuje intumwa z’ikigega mpuzamahanga cy’Imari (IMF) n’abahagarariye Guverinoma y’u Rwanda mu rwego rw’ubukungu, byemeje ko igipimo cy’izamuka ry’ubukungu bw’u Rwanda muri uyu mwaka gihindurwa, kikava kuri 7.8 % kikaba 8.5%.

Ibi byemejwe nyuma y’uko intumwa za IMF zikoze ubugenzuzi mu bukungu bw’igihugu, ngo zigasanga hari imishinga ikomeye mu rwego rw’ubwubatsi izagira uruhare rukomeye muri uyu muvuduko. Ikindi bashingiyeho ni ibipimo by’umwaka ushize.

Mu mwaka ushize wa 2018, ubukungu bw’imbere mu gihugu (GDP) bwari bwazamutse ku kigero cya 8,3% bivuye kuri 4,6% byariho mu mwaka wari wabanje wa 2017.

Ubuhinzi bwagize uruhare mu kuzamura ubukungu ku kigero cya 6,3%, inganda zitanga umusanzu ku 9,3% mu gihe ibikorwa bya serivise nabyo byagize uruhare ku 8%.

Iyi mibare kandi yerekanaga ko ibicuruzwa bitumizwa mu mahanga byari byiyongereye ku kigero cya 9,5%. Ibyoherezwa mu mahanga ngo byiyongereye ku kigero cya 5,5%.

Ibi ngo byatumye ifaranga ry’u Rwanda ngo rikomeza kwihagararaho ku isoko ry’ivunjisha kuko ryahungabanye ku kigero cya 4% imbere y’idorali ry’Amerika.

Ibiciro ku masoko ntabwo byahindaguritse cyane kuko byazamutse ku kigero cya 1,4% mu gihe mu mwaka wari wabanje byari byazamutseho 4,8%.

Bikaba biteganijwe ko muri uyu mwaka 2019 nabwo bizazamuka ku kigero cya 3%.

Inguzanyo zatanzwe muri banki z’ubucuruzi ngo nazo zariyongereye ku kigero cya 17,1 bivuye kuri 4,6% mu gihe abatashyura neza inguzanyo nabo bagabanutseho 6,4%.