Imigabo n’imigambi mishya by’umutoza wa Rayon Sports nyuma yo guhagarikwa na Mukura

0
2457
Rayon Sports yanganyije na Mukura VS kuri uyu wa gatatu

Umutoza w’ikipe ya Rayon Sports Ivan Minaert aratangaza ko kubura Kwizera Pierrot byabashegeshe cyane, ngo gusa agiye gukomeza gushaka impinduka zatuma mu mikino itaha bagomba kwitwara neza kurushaho.

Rayon Sports  yaraye inganyije na Mukura V.S ubusa ku busa, nyuma y’uko umukino ubanza nawo bari bawunganyije na Kirehe FC.

Ibi byashyize mu kaga Rayon Sports ndetse binatuma isigara inyuma ku rugamba rwo guhatanira igikombe cya shampiyona bahaniye na APR FC ndetse na AS Kigali.

Umukino bakinnye na Mukura V.S ukirangira umutoza Ivan Minnaert yahise atangaza ko kubura Kwizera Pierrot byabashegeshe ariko ngo barakomeza gushaka impinduka zatuma ikipe isubira mu bihe byiza.

Ati: ”Twashakaga amanota 3 ariko dutakaje 2, birababaje ariko tugomba gukomeza gukora tugashaka igisubizo ibi bihe tukabivamo. Dufite ba myugariro 5 uyu munsi twaruhukije Faustin na Gaby umukino utaha tuzaruhutsa Ange. Naho hagati mu kibuga  kuwa gatandatu  wenda Yannick azaba yagarutse mu bihe byiza ariko murabibona ko iyo twabuze Pierrot tuba twabuze byose nizera ko naza ibintu bizahinduka”.

Umutoza Ivan Minnaert wicaye hagati ya Lomami Marcel umwungirije wambaye ikabutura na Nkunzingoma Ramadhan utoza abazamu

Hagati aho Haringingo Francis umutoza wa Mukura V.S we arakubita agatoki ku kandi ko Rayon Sports yamucitse. Ati: ”Iyo ukinnye n’ikipe ikomeye ntigutsinde urishima ariko jyewe mbona ari umukino twari dukwiye gutsinda kuko ikipe ya Rayon Sports twayirushije.”

Rayon Sports ikimara gutakaza uyu mukino yahise igira amanota 36 iguma ku mwanya wa 3 naho Mukura V.S yo ni iya 9 n’amanota 24.

Indi mikino yabaye Gicumbi yatsinze Bugesera  ibitego bibiri kuri kimwe, naho Amagaju atsinda Musanze  igitego kimwe ku busa. Mu gihe uyu munsi Kirehe yakira APR FC naho Sunrise FC ikakira AS Kigal, Espoir nayo ikakira Kiyovu Sports I Rusizi.