Imigabane ya Juventus yahungabanye nyuma yo gutsindwa na Ajax

0
816
Juventus yasezerewe na Ajax Amsterdam muri kimwe cya kane muri UEFA Champions league. Ifoto: interineti

Imibare ituruka ku isoko ry’imari n’imigabane rya Borsa Italiana ribarizwa mu mujyi wa Milan mu Butaliyani, yerekana ko imigabane y’ikipe y’umupira w’amaguru Juventus yahungabanye bikomeye.

Imigabane ya Juventus yahungabanye nyuma y’uko ikuwemo n’ikipe ya Ajax Amsterdam yo mu buhorandi mu mikino ya UEFA Champions League.

Ajax ikimara gukuramo Juventus mu ijoro ryashize, ngo imigabane y’iyi kipe yo mu Butaliyani yahise ingwa ku kigero kiri hejuru ya 22% nkuko byemezwa n’umunyamakuru wa BBC ukorera I Milan.

BBC ivuga ko mu gitondo cyo kuri uyu wa gatatu, iyi migabane ya Juventus yagerageje kugaruka aho yahoze ariko ngo biranga kuko nanubu ikomeje guhungabana munsi ya 17% bibarirwa agaciro k’iyero 1.40 (1,435.92 Frw).

Kugeza ubu, umugabane umwe wa Juventus uhagaze amayero 1.378 ku isoko ry’imari n’imigabane rya Borsa Italiana (rimwe rukumbi rikomeye i Milan mu Butaliyani).

Ibi bikaba ari bimwe mu ngaruka z’uko Ajax Amsterdam yasezereye Juventus muri ¼ cy’imikino ya UEFA Champions league, nyuma yo kuyitsindira ku kibuga cyayo 2-1.

Mu mukino ibiri yahuje aya makipe yombi (ubanza n’uwo kwishyura) Ajax yabashije gutsinda Juventus ibitego 3 kuri 2.

Imigabane y’iyi kipe binyuze mu mukinnyi w’icyamamare Cristiano Ronaldo yari yabashije kuzamukaho agaciro k’iyero 1.71 muri uyu mwaka wa 2019 nubwo yahungabanye nyuma yo kuva muri aya marushanwa UCL.