CAF yifurije umukinnyi w’umunyarwanda isabukuru nziza y’amavuko

0
1606

Impuzamashyirahamwe y’imikino y’umupira w’amaguru muri Afurika (CAF) yifurije isabukuru nziza rutahizamu wa APR FC wavunikiye mu ikipe y’igihugu Amavubi, Sugira Ernest bivugwa ko yujuje imyaka 27 y’amavuko.

Ibicishije ku rukuta rwayo ku rubuga nkoranyambaga rwa Twitter, CAF yifurije isabukuru nziza ya 27 rutahizamu w’Umunyarwanda Sugira Ernest.

Sugira yifurijwe isabukuru nziza na CAF

Sugira Ernest ni umwe muri ba rutahizamu beza u Rwanda rwagize dore ko yanabigaragaje muri CHAN 2016 yabereye i Kigali, aho yabaye umwe mu batsinze ibitego byinshi, agahita agurwa na AS Vita Club yo muri Repubulika iharanira Demokarasi ya Congo.

Kuri Paji ye kuri Wikipedia Sugira yagaragaje ko yavutse kuwa 27/3/1991, akavukira mu Karere ka Muhanga ho mu Ntara y’Amajyepfo.

Sugira muri CHAN yagiye atorwa nk’umukinnyi w’umukino

Mu 2012-2013 yakiniye AS Muhanga, ayivamo ajya muri APR FC ayikinira umwaka wa  2013-2014, na yo ayivamo ajya muri AS Kigali aho yakinnye imyaka ibiri (2014-2015 na 2015-2016), ahita yerekeza muri AS Vita Club.

AS Vita Club yo yayisinyemo amasezerano y’umwaka n’igice, ariko imusezerera amazemo umwaka umwe gusa wa 2016, ahita agaruka muri APR FC, aho yageze mu mpeshyi ya 2017 agahita avunika atarayikinira umukino n’umwe.

Sugira mu bitaro yaravunitse

Sugira yavunitse muri Kanama 2017 ubwo yari yahamagawe mu ikipe y’igihugu Amavubi yiteguraga gukina na Uganda Cranes mu mukino wo kwishyura w’ijonjora rya nyuma ryo guhatanira itike yo kujya muri CHAN 2018.

Sangiza