Abatoza b’umupira w’amaguru bakomeje gushwana n’amakipe yabo, Gatera abaye uwa 11

0
630
Gatera Alphonse abaye umutoza wa 11 mu bamaze gutandukana n'amakipe muri shampiyona y'uyu mwaka. Ifoto: internet

Umutoza w’ikipe ya Sunrise Gatera Alphonse yamaze gutandukana n’iyi kipe akaba abaye umutoza wa 11 uvuye mu ikipe kuva iyi shampiyona yatangira.

Gatera Alphonse yabwiye HOSE.RW ko yagiye yeguye kubera imibereho itari myiza iri muri Sunrise, irimo kudahemba abakinnyi ndetse no kutabaha ibindi byangobwa byabafasha gutsinda imikino isigaye ya shampiyona.

Gatera agiye asize  Sunrise ku mwanya wa 8 n’amanota 27, Sunrise yitwaye neza mu mikino ibanza ya shamiyona ariko mu mikino yo kwishyura ikomeza gusubira inyuma ndetse ikaba yari  imaze gutsinda umukino umwe gusa mu mikino 5 yarimaze gukina.

Uku kutitwara neza umutoza Gatera n’abakinnyi ba Sunrise bavugaga ko biterwa n’uko nta mikoro ahagije ikipe yari ifite kuko itari ikibasha kubahemba no kubaha ibindi byangombwa bibafasha gutegura imikino.

Sunrise bivugwa ko ihabwa miliyoni 150 n’akarere ka Nyagatare ariko abayobozi bayo baherutse kuvuga ko yose yashize ubu batari kubona ayo bakoresha.

Bivugwa ko bamnwe mu bayobozi b’iyi kipe ubu batangiye gukorwaho iperereza ngo harebwe niba bataranyereje ingengo y’imari iyi kipe yari gukoresha.

Hagati  aho Gatera abaye umutoza wa 11 utandukanye n’ikipe ye kuva iyi shampiyona yatangira. ubu abatoza 5 gusa nibo basigaranye n’amakipe batangiye shampiyona batoza.

Amakipe nka APR FC,  Rayon Sports, Police FC,  Espoir,  Musanze FC, Gicumbi FC, Bugesera FC, Miroplast FC, Kirehe FC n’Amagaju FC nizo zabanjirije Sunrise gutandukana n’abatoza bazo zimwe zarabirukanye abandi baregura barasezera.

Ibi bivuze ko Kiyovu Sports, Mukura, AS Kigali, Etincelles na Marines arizo zonyine zisigaranye abatoza batangiranye shampiyona.